Масмедіюм є: в узшым змыслї масовокомунікачне средство в шыршім змыслї і приналежна орґанізація ці інштітуція. Масмедія суть така ґрупа медій, котры суть шпеціфічно дізайнованы так, жебы засягли барз велику публіку (тіпічно холем так велику як є цїле жытельство державы).
Є то шыроко росшырене средство інформацій вшыткых сорт як преса, радіо, телевізія і под. Хоць масмедія представляють высокоцїнне културне здобытя, кладуть філозофії културы вопросы своїма счасти неґатівныма културнополітічныма ефектами. Потреба ословити вшыткых і обертати ся зато на обычайного реціпієнта, мать окрем іншого тоты наслїдкы: тото, што ся понукать, давать ся справила на общо зрозумілій уровни, з чім є звязане спрощіня, неточны формулації, баналны додаткы і под., з чого слабше школованы приїмателї, котрых є векшына з публіка, приїмають переважно гесла і просты фразы без того, жебы собі передумали цалок; кідь тоты гесла „формують“ язык, та ся масмедія чують змушено, приспособовати ся тому языку, чім ся леґалізує тото „зобычайнёваня“ языка.