Метафора, з μεταφορά перенос; переносный вызнам, од μετά над и φορός несучый — языкова и реторична литературна конштрукция, основана на переношаню значѣня на базѣ вонкашной (штруктуралной) подобности.Білоус П., с. 323.Ожегов С.И. Толковый словарь
Метафора — одмѣна тропу, значить, переносить вызнам з оригиналного понятя на иншый предмет. Е частьов звычайной функции и хоснованя языка, але векше значѣня мать передовшыткым в поезии.
Метафоры годны схосновати розличны сорты подобностей, дотычны: формы або штруктуры – зуб пилы; россягу або множества – капка щастя; функции – голова родины; мѣста або пологы – чоло постели.
Од метафоры ся одрознять метономия, што е переношаня значѣня на базѣ иншой, як подобность, повязаности, напримѣр, переношаня значѣня подля походжѣня або причинности (примѣром, з автора на дѣло, з активит на фирму итд.), переношаня з едного яву на другый находячи ся типично в его околици (стрѣлив перун), з горнця на его обсяг.
Метафора несе в собѣ великый набой субъективной перцепции, индивидуалного виджѣня свѣта, особности умѣлця. Своеродность поетичного свѣту писателя во великой мѣрѣ звязана з его метафориков (практиков хоснованя метафор).Соловей-Гончарик Е.
Так исто в метафорѣ мож видѣти характерности регионалной або зоналной културно-литературной системы, а тыж народностной менталиты, свѣтозору, традиций, што свойствено вшиткым тропам, але в метафорѣ ся указуе найповнѣйше. Се чинить проблемы при перекладѣ красного писемства: тяжкость, а даколи неможность адекватного перекладу метафоры.
Метафоричность вышла за границѣ поезии, характерна не лем про литературу, але вообще про сегочасне умѣлецке мыслѣня, так мож говорити о метафоричности филму, метафоричности малярства и подобне. Метафора уже не е лем объектом штилистикы и поетикы, але ставать ся предметом штудий в семиологии, логицѣ и методологии наукы, в теории познаня.
Жерела и одказы Білоус П.: Термінологічний словник. //Білоус П. В.: Вступ до літературознавства: навч. посіб. — Київ: ВЦ «Академія», 2011. — 336 с. — — сс. 316-330. Соловей-Гончарик Е.: Метафора //Лексикон загального та порівняльного літературознавства. — Чернівці: Золоті літаври, 2001 — 636 с. Ожегов С.И Толковый словарь https://web.archive.org/web/20240106184910/https://lexicography.online/explanatory/ozhegov/%D0%BC/%D0%BC%D0%B5%D1%82%D0%B0%D1%84%D0%BE%D1%80%D0%B0
Референции
Катеґорія:Семантика Катеґорія:Штилистичны средства Катеґорія:Литературны термины