Нѣмецке цѣсарство або Нѣмецкый райх (), тыж означована як Империалне Нѣмецко, Другый райх (), або Кайзеровске Нѣмецко — держава, котра екзистовала в середньой Европѣ в конци 19. и зачатку 20. стороча. Тоты назвы ся обычайно поужывають на означѣня Нѣмецка в роках 1871 аж 1918, коли было конштитучнов монархиов: од споѣня Нѣмецка и выголошѣня прусского краля Вилгелма I. за нѣмецкого цѣсаря 18. януара 1871 аж по фактичне выголошѣня Ваймарской републикы Филиппом Шайдеманном 9. новембра 1918 и формалне зречѣня ся трону Вилгелма II. 28. новембра 1918. Найважнѣйшы державы, котры сусѣдили з Нѣмецкым цѣсарством: Российска империя на выходѣ, Франция на западѣ и Австро-Мадярщина на югу. В року 1871 мало Нѣмецко 41 милионох обывательох, до року 1913 тото число выросло на 68 милионох.

Споене Нѣмецко, котре было в року 1815 переважно сельске, ся стало переважно мѣстскым.J. H. Clapham, The Economic Development of France and Germany 1815–1914 (1936) Успѣх индустриализации Нѣмецка на зачатку 20. стороча ся выказовав двоито; нѣмецкы товарнѣ были часто векшы и модернѣйшы од многых их бритскых и французскых аналогох, але ремеселный сектор быв веце заосталый. Успѣхы Нѣмецкого цѣсарства в природных науках, особенно в физицѣ и хемии, были такы, же една третина вшиткых Нобеловых наград припадала нѣмецкым вынаходникам и студовательом. За 47 рокы свойой екзистенции ся Нѣмецке цѣсарство стало промыселнов, технологичнов и научнов державов в Европѣ а ку року 1913 Нѣмецко ся стало найвекшов економиков в континенталной Европѣ и третьов найвекшов на свѣтѣ (по США и Китаю).

Выголошѣня цѣсарства

В року 1866 в резултатѣ побѣды над Австриев прусскый канцлер Отто фон Бисмарк успѣшно реализовав свой план споѣня 17 нѣмецкых земель в конфедерацию. Далша надзвычайно выгодна ситуация подобного характера склала ся в року 1870, коли, выхосновавши честолюбивость Наполеона III., выпровоковав го на войну, котру Сѣверонѣмецка конфедерация легко могла выиграти, чим бы ся еще веце розмогла нѣмецка народна пыха и дяка на споѣня. И на тот раз план ся удав. Еще в ходѣ витязной войны, 18. януара 1871 в Зеркаловой салѣ Версайского замка под Парижом было славностно выголошено створѣня Нѣмецкого цѣсарства (райха). Цѣсарство было федерациев 25 самостатных политичных единиць (четыре кральовства, шѣсть надвойводств, четыри войводства, восѣм княжеств и три вольны городы: Гамбург, Бремен, Любек). Колективным носительом суверениты поважовали ся 22 нѣмецкы пановникы и сенаты трьох городох. Райхсканцлером зостав на цѣлы 20 рокы Отто фон Бисмарк. Цѣсарь мав право скликати и роспустити райхстаг (парламент), схвалити або ветовати приняты ним законы. Кральовство Пруссия мало в цѣсарствѣ ключову позицию и хоть в райхстагу мало лем 17 мѣст зоз 58, але на реализацию ключовой позиции мало право вета.Патрушев А., сс. 288, 293.

Нѣмецкы цѣсарѣ Ключова роль Пруссии была и в том, же цѣсарьом (Deutscher Kaiser) подля конштитуции быв все лем краль Пруссии.

Династия Гогенцоллерн (Hohenzollern) Цѣсарь зачаток панованя конець панованя Вилгелм I. 18. януар 1871 9. марец 1888 (смерть) Фридрих III. 9. марец 1888 15. юн 1888 (смерть) Вилгелм II. 15. юн 1888 9. новембер 1918 (абдикация)

Доба Бисмарка Бисмарк быв канцлером безмала 20 рокы (1871–1890). В заграничной политицѣ успѣшно провадив мирну политику, што вело до змоцнѣня меджинародных позиций цѣсарства. В домашной политицѣ быв конзерватор, не розумѣв демократичны тенденции епохы, кажду политичну опозицию поважовав за «антидержавну». Бойовав против католикох (Пруссия была переважно протестантска), против социалистох, против либералох. Была доба техничной револуции, индустриализации, вывинула ся буржоазия, але в сполоченствѣ тон подавала все ще шляхта. Наконець, по рядѣ неуспѣхох, молодый цѣсарь Вилгелм II. одволав го з поста канцлера.Патрушев А., с. 293. Приорита едности цѣсарства Найвекшов идеев и заслугов Бисмарка было створѣня еднотного нѣмецкого цѣсарства: быв он мудрым и осторожным политиком, знав, кедь требало, выволати конфликт меджи неприятелями Нѣмцьох и зыскати хосен з того, але знав и пересвѣдчити на компромис конфликтуючы нѣмецкы партии, указуючи им на их сполочный высшый интерес. Таков великов его заслугов было замирѣня конфликта з року 1862, коли прусскы либералы в бою против краля Вилгелма I. домогали ся повной влады про парламент. Бисмарк подав проект змирюючого акта, котрым мав быти либерализм подрядженый национализмови. В день выберанок нового парламента, 3. юла 1866 Пруссия выграла битку под Кениггретцом (Градец Кралове) над Австриев, а 3. септембра 1866 парламент переважнов векшинов прияв змирюючый акт. За то Вилгелм I. до конця живота поважовав Бисмарка за незамѣнимого политика, а либералы го таксамо честовали.German Empire. Економична криза Едным з найвекшых неуспѣхох Бисмарка была економична политика. В року 1871 цѣсарство зыскало 5 милиарды золотых франкох контрибуции и анектовану промыслову базу Елзас-Лотрингии, што могло служити добров основов про могутный рост економикы. Намѣсто довгодобых инвестиций тот «золотый дождь» быв пущеный на финанчны шпекулации. Уже ку концю року 1873 зачала ся страшна криза надвыробы, масовы банкротства банкох, промысловой выробы, а о два рокы и аграрного сектора.Патрушев А., сс. 296–297, 299–300. В маю 1875 Бисмарк подав резигнацию, але Вилгелм I. ю одхылив.Патрушев А., с. 305. Бисмарк од рокох 1878–1879 перешов ку новой економичной политицѣ, ориентованой на протекционизм, ограничѣня против социалистох, либералох, Церкви и Жидох. Велика депресия тягла ся аж до рока 1896, а едным з ей наслѣдкох став ся закорѣненый в нѣмецком сполоченствѣ антисемитизм.Патрушев А., с. 301. Колониална политика Бисмарк особнѣ быв против того, жебы Нѣмецке цѣсарство приростало колониями, предвидячи там веце проблем як хосну. Але в року 1884, коли нѣмецкый подузятник Алфред Людериц купив територии в Африцѣ и просив нѣмецку владу санкционовати тоту транзакцию, Бисмарк выголосив протекторат цѣсарства над тыма териториями, в Берлинѣ была скликана конференция о роздѣлѣ Африкы. Далша колонизация вела ся на приватной основѣ Сполком нѣмецкой колонизации тай иншыма подобныма компаниями, а в року 1914 нѣмецка колониална империя мала плоху 2,9 млн. км2 з обывательством 12 млн. особ.Патрушев А., с. 315. Колониална империя не была нигда сериозным фактором в економицѣ Нѣмецкого цѣсарства, але задоволяла ростуче чутя народной гордости. Конець канцлерства По смерти Вилгелма I. на трон наступив его сын Фридрих III., котрый мав жену Англичанку и быв либералом, але национал-либералом, готовым на компромис зоз Бисмарком. Авшак другый цѣсарь быв тяжко хворый и пановав лем 99 днѣ. Третий цѣсарь, молодый и амбитный Вилгелм II. не чув ся нияк завязаный перед Бисмарком. В року 1889 и на зачатку 1890 стали ся понад 1000 штрайкох, што указало повне фиаско ограничуючых законох. Бисмарк подав законопроект на еще векшы ограничѣня, але парламент го одхылив. Наконець, на выберанках 1890 его парламентска коалиция зоз 220 упала до 135 мѣст. 18. марца 1890 на жаданя цѣсаря 75-рочный Бисмарк резигновав.Патрушев А., сс. 318–319.

Доба Вилгелма II. Другу половку истории Нѣмецкого цѣсарства называють добов Вилгелма II. з даколькых доводох. За тот час перемѣнили ся восьмеро канцлеры. Нелем в политицѣ, в газдовствѣ, але и в цѣлом духу цѣсарства настали великы перемѣны. В школствѣ и в науцѣ намѣсто гуманитарных наук наперед вышли практичны наукы, котры могли ся уплатнити в газдовствѣ, войску и политицѣ. Нѣмецкый промысел зачав добывати свѣтовы торгы, а нѣмецкый флот — моря.II. Vilmos uralkodása.

Подля промысловой выробы цѣсарство стало на друге мѣсто по США. Але Вилгелм II. не мав ни скушености, ни знаня, ни осторожности, такых як Бисмарк. Дух милитаризма чимдале веце отравльовав сполоченство, статочным чоловѣком быв поважованый лем тот, што одслужив во войску и вернув ся до цивилу вояком або офицером резервы. Нова загранична политика приводила цѣсарство до все векшой изолации. Во внуторной политицѣ были пороблены значны перемѣны во створѣню «социалного штату», од котрых цѣсарь чекав достати роботный люд на свою сторону, але коли видѣв, же ся так не стало, вернув ся ку реакчному курзу. При вонкашной могутности Нѣмецке цѣсарство зоставало в собѣ слабым и нестабилным.Патрушев А., с. 320.

Вилгелм II. хотѣв пановати самовладно, быти сам собѣ канцлер, персонално завдавати и вонкашну и внуторну политику. Его справованя ся даколи было нечекане и неадекватне. Болгарского царя публично копнув в гузицю, а российского великого князя ударив маршалскым жезлом по хребтови.Патрушев А., с. 322. В року 1913 Нѣмецке цѣсарство стало ся другов наймогутнѣйшов морсков державов по Споеном кральовствѣ.Патрушев А., с. 335. Нѣмецкы генералы рвали ся в бой и были пересвѣдчены, же добудуть скору и легку побѣду, и в лѣтѣ 1914 цѣсарь одважив ся на ризико великой войны.Патрушев А., сс. 343–344.

Конець цѣсарства Война од зачатку пошла не подля плана нѣмецкого генералного штабу, але подля властной логикы. Блискавична война не подарила ся, а перешла в позичне протистояня з величезныма материалныма и людскыма утратами. Роль цѣсаря, а тым веце его канцлерох, одсунула ся в тѣнь, в августѣ 1916 в цѣсарствѣ установила ся военна диктатура найвысшого велителя Паула фон Гинденбурга и велителя генералного штабу Ериха Лудендорфа. Ресурсы Нѣмецкого цѣсарства были близкы до вычерпаня, а шансы на побѣду близкы до нулы. Коли в року 1917 во войну на сторонѣ Антанты вступили США з их великыма ресурсами, резултат войны быв рѣшеный.Патрушев А., с. 347.

Тым часом револуция в России и ей выход з войны в марцу 1918 дав шанс Нѣмецкому цѣсарству отворити офензиву на западном фронтѣ, але переломити ход войны ани тото уже не могло. Зачала ся револуция, и 9. новембер 1918 став ся послѣдным дньом Нѣмецкого цѣсарства. Цѣсарь и монархы всѣх держав цѣсарства зрекли ся своих тронох.

Статья 227 Версайского договора поклала персоналну вину за Перву свѣтову войну на Вилгелма II. и мав быти судженый шпециалным судом пятьох главных витязных держав (США, Споене кральовство, Франция, Италия, Япония).

Жерела и одказы

Референции

Катеґорія:История Германии Катеґорія:Заниклы штаты Германии