Роспад Югославии — сполочна назва подѣй з рокох 1991 – 2008, наслѣдком котрых бывша Социалистична Федеративна Република Югославия (СФРЮ) ся роспала на шѣсть независимых штатох и еден часточно вызнаный.
Зачаток роспада По смерти доживотного президента Йосипа Броза Тита (4. май 1980) поступно слабла централизация влады и економична ситуация, в року 1981 зачала ся народностна, политична и економична криза в Косовѣ, на котру влада одповѣла выголошѣньом штатарии, што не рѣшило, лем заморозило конфликт. Процес роспада ся зачав роками 1991 – 1992, коли из СФРЮ ся выдѣлили четыри из шѣстьох републик: Словения и Хорватия (обѣ 25. юна 1991), Македония (референдум 8. септембра 1991) ай Босния и Герцеговина (3. марца 1992). В Боснии и Герцеговинѣ ся зачала домова война. Тогды на територию раз Боснии и Герцеговины, а пак и автономного края Косово были заведены миротворны силы ОЗН.Путятин В. С.
Гуманитарна интервенция
Од року 1995 погоршила ся ситуация в автономном краю Косово и Метохия, де албанскы сепаратисты зачали терористичны збройны акции против влады и мѣстного сербского обывательства. НАТО добивало ся, жебы до Косова было впущене натовске войско, а понеже Сербы на то не приставали, 24. марца 1999 США и их сполочникы зачали военску операцию в автономном краю Косово и Метохия, котра де факто была росширена на цѣлу територию Сербии. Они ся выгваряли, же то гуманитарна интервенция, але то было зведене без мандата ОЗН, зашто законность операции мож оспорити, и дакотры критикы поважують, же была то военска агресия.Андреев М. В. Гуманитарна интервенция мала форму масованого бомбардованя цѣлой територии Союзной Републикы Югославия, з масовыма жертвами цивилного обывательства, пустошѣньом инфраструктуры, економикы и продовжала ся до 10. юна 1999, коли сербске войско было вытѣснене з Косова и вымѣнене на натовске.
Завершѣня роспада Новый штат под назвов Союзна Република Югославия (СРЮ) створили были Сербия и Чорногория 27. апрѣля 1992, и такой тот день была принята конштитуция СРЮ, декларовавша самостойность двох републик але сполочный економичный простор. Неодовго ся зачала домова война в Хорватии ай Боснии и Герцеговинѣ, за то была обвинена СРЮ и резолюциев Рады Безпечности ОЗН было против ней заведене повне торгове ембарго: перерваны авиалеты, научны, културны и шпортовы контакты. Тото вело ку повной изолации СРЮ и острому упадку економичной ситуации. Лем по подписаню Дейтонской полагоды (децембер 1995) санкции были зняты. Выхосновавши спорны стороны односин Сербии и Чорной Горы дипломаты Евроунии нахылили их перетворити СРЮ на конфедеративну Унию Сербии и Чорной Горы. Главный смысел того прейменованя быв тот, же слово Югославия, котре было на мапѣ Европы од року 1929, наконець выпало з назвы, чим Третя Югославия закончила свое ествованя.Allcock, John B. and Lampe, John R.
Дуалистичный штат Сербия и Чорна Гора екзистовав ещи од року 2003 по 2006, а 3. юна 2006 года Чорна Гора вышла з унии. 17. фебруара 2008 еднобочно выголосила независлость од Сербии Република Косово, котра доднесь зоставать лем часточно вызнана.
Жерела и одказы
Андреев М. В.: Современные проблемы взаимодействия СБ ООН с региональными организациями в сфере обеспечения международного права и безопасности // Вестник ТИСБИ : журнал. — 2001. — № 1. Путятин В. С. ЮГОСЛАВИЯ //Большая российская энциклопедия. Том 35. Москва, 2017, Верзия: 2017. Одчитане: 19.02.2021
Референции
Категория:Історія Европы Категория:Войны 20. стороча