Os merovinchios estioron una dinastía de reis francos d'orichen salio que baixo o reinato de Clodoveu I vencioron a los galorromans d'o Reino de Siagrio y a los visigodos d'o Reino de Tolosa, prenioron o control d'a mayor part de l'ueste y centro de Galia y creyando un reino muito extenso y poderoso entre os sieglos V y VIII denominato por os historiadors como Reino Franco. En l'anyo 543 sozmetioron tamién o Segundo reino d'os burgundios.
O Reino Franco d'os merovinchios comprendeba territorios de l'actual Francia, de Belchica, d'una parti d'Alemanya y de Suiza. Teneban a tradición de dividir o reino entre diferents hereus y reunificar-lo dimpués. As unidaz principals d'o Reino Franco en o periodo merovinchio yeran Austrasia (a rechión d'o Mosa, Mosela y Rin), Neustria (norte de Galia), y Borgonya (antiga Burgundia u Reino d'os Burgundios). Neustria yera habitata por una gran mayoría de población autoctona galorromana y teneba mes importancia en o sieglo VII tiempos de Dagoberto. Austrasia yera a rechión mes chermanizata y incluiba as tierras d'orichen d'os francos, teneba mes importancia en o sieglo VIII.
Os merovinchios yeran suposatos descendients de Meroveu, fundador eponimo d'a dinastía. O primer representant historico d'a dinastía merovinchia, Khilderico I (458 dica 481), fillo de Meroveu (rei dende 448 dica 457), dominó una parte de l'antiga provincia romana d'a Galia Belga (a Belgica Segunda) que compreneba os territorios de:
Ciuitas Remorum. Ciuitas Suessionum. Ciuitas Veromanduorum. Ciuitas Atrebatium. Ciuitas Silvanectum. Ciuitas Bellovacorum. Ciuitas Ambianensium, tamién conoixita como Ambianorum. Ciuitas Morinorum. Ciuitas Camaracensium antiga C. Nerviorum. Ciuitas Catalaunorum. Ciuitas Bononensium.
Os reis merovinchios deixoron que os mayordombres de palacio prenesen mes importancia en o gubierno, y convertindo-se con o tiempo en qui teneban o poder de verdat. Arribó l'inte que a dinastía d'os merovinchios fue substituyida por a dinastía Carolinchia, familia orichinaria d'a cuenca d'o Mosa a la que pertanyeban bels mayordombres de palacio como Pepín de Heristal, Carlos Martel y Pepín lo Petit y en l'anyo 751 este zaguero deponió a lo zaguer rei merovinchio, Khilderico III.
Mencions en fuents aragonesas y navarras En o "Liber Regum" fan una lista de reis anteriors y posteriors a Carlos Magno:
Categoría:Edat Meya Merovinchia