O turcazoCon as variants turcaz, torcazo y trucazo ( (Linnaeus, 1758)) ye una especie de palomo salvache propio d'Europa, Orient Meyo y o norte d'Africa.

Pertenece a la orden Columbiformes y a familia Columbidae, en a que comparte o chenero Columba con belatras especies, como os palomos caseros.

Descripción Ye o palomo mas gran que habita en a Peninsula Iberica, con o cuerpo robusto y a cabeza chicorrona en comparanza. Mesura bels 40 cm dende o pico dica la coda. FELIX, Jîrî y TOMAN, Jan; Guía de Campo (3ª Ed.); Ediciones Susaeta. Madrid, 1999.

A color d'o plumache, muit caracteristica y sin cuasi variacions d'entre individuos, ye plumiza, con brilluras azulencas y moradas en a tripa y o papo. En o cuello i tiene dos mallas blancas, a costau y costau, que la fan inconfundible.

O tulido que fa ye caracteristico tamién, con una voz pareixida a .

Hábitat Os turcazos habitan en as selvas, tanto en as de coniferas como en as de planifolios, anque prefieren as selvas mixtas. En Europa central y en o Norte as poblacions de turcazos son migraderas, y marchan cara ta'l sud d'o continent y o norte d'Africa en setiembre, d'a on que en tornan cara ta marzo. En a Europa atlantica y mediterrania i remanen tot l'anyo. En cualques zonas d'o magreb no i son sique hibernaderas.

Como todas as columbidas, os turcazos s'alimentan de simients, preferencialment cerials, anque incluyen en a suya dieta lulos y cocullos brostadors que pican en as brancas. O consumo d'alimentos d'orichen animal (insectos, larvas, etc.) ye anecdotico.

En l'actualidat, cualques poblacions s'ha establiu en as ciudatz, y se'n i puede veyer con frecuencia en os parques y os chardins publicos, tot coexistindo con belaltras especies de palomos urbanas. Mientres que os turcazos de ciudat se son acostumbraus a la presencia humana, y s'agosan con frecuencia a on son as personas ta picar alimento, os turcazos de poblacions salvaches, como os que se'n troba en l'Alto Aragón, son muit timidos y a sobén s'ahopan cuan sienten a presencia humana nian a decenas de metros.

Niedo A nidificación a fan en as ramas d'os árbols u en arbustos bien pretos, d'entre 5 y 30 metros por alto d'o suelo. Fican 2 uevos de regular, excepcionalment dica 3, y s'aclucan d'entre 16 y 19 días ta cobar-los.

Os pollez, como os de toz os turcazos, naixen despullaus y con bels flequichons, que nian gosan estar plumas de verdat, de color amariella. Os empapan y os apuyan d'entre toz dos prochenitors, y os pichons (turcazos chuvenils) prencipian a esvolutar-se en o niedo a partir d'os 20 días de vida, d'a on que se revolan a partir d'os 30.

Imáchens

Caza thumb|right|200px|O turcazo ye una carne de caza muit apreciada. Os turcazos son aus de caza prencipals. En l'Alto Aragón se'n i caza con frecuencia, pus i son abundants, y como todas as Columbidae son animals prolificos que gosan sacar mas d'una cobada cada anyada, por o que con as adecuadas precaucions as suyas poblacions se mantienen estables nian atamas de a presión cinechetica.

A cazada d'os turcazos se fa en resacando-los, que ixo ye, cuan uno u mas d'un cazataire s'amaga en a marguin d'un campo, y un altro, o «resacador», s'adintra en a selva colindant a on se sabe que en i ha, y con a suya presencia y o rudio que fa prevoca que os palomos se revolen, tot mirando ta que amaneixcan por alto d'o campo obierto.

O costumbre d'istes animals de desplazar-se en parellas u chicoz estallos fa que, cuan se'n resaca un grupo, con escopetas y bels cazataires se'n pueda abatir uns cuantos eixemplars d'una sola tongada.

Zoonimia thumb|right|180px|As mallas a costau y costau d'o cuello son as responsables de a etimolochía d'o nombre «turcazo». O zoonimo turcazo dimana d'o latín <*torquatus, «o qui tiene collar» (de <torque, «collar»), y fa una referencia clara a las dos mallas blancas en o cuello d'os adultos. A parola ye común a l'aragonés y a o castellano, anque ista zaguer luenga s'estima mas emplegar a parola con chenero femenino, mientres que en aragonés o chenero ye mayoritariament masculino.

A forma turcaz coexiste en buena cosa d'o dominio lingüistico aragonés con a forma "turcazo", con -o final que refirma o chenero masculino. Todas dos presentan dos pronuncias alternativas, la una con [o] y l'altra con [u], VIDALLER TRICAS, Rafel: Libro de As Matas y Os Animals; Dizionario aragonés d'espezies animals y bechetals, Edicions Val d'Onsera, Zaragoza, 2004. . en a primer silaba.

Como ye regular en aragonés, en existe versions con metatesi de a consonant R, como trucazo y trucaz, que s'alternan en a cheografía con as que tienen l'orden natural d'as consonants.

Ditos y mazadas «Si trucazos quiers cazar bel día t'estozarás» Pedro Arnal Cavero: Refranes, Dichos, Mazadas... En El Somontano Y Montaña Oscense, Prames, 2013, ISBN 978-8483213957, p.146

Notas

Referencias

Vinclos externos

Categoría:Aus d'Aragón Palumbus Categoría:Fauna d'Europa Categoría:Fauna d'Africa Categoría:Fauna d'Asia Categoría:Fauna d'Andorra Categoría:Fauna d'os Pireneus Categoría:Taxons nombraus por Carl Linnaeus