Irene Ferreras López de Lamela, nada en Fuenlabrada (Madrid) o 4 de marzo de 1989, é unha exfutbolista e adestradora de fútbol española.
Traxectoria Como xogadora Comezou a súa carreira futbolística no equipo filial do Rayo Vallecano desempeñando o posto de gardameta, onde chegou a formar parte do primeiro equipo. Pasou polo CF Pozuelo de Alarcón e rematou a súa carreira como futbolista no equipo filial do Atlético de Madrid. Retirouse no ano 2015 por mor dunha hernia de disco que lle impedía competir en condicións axeitadas.
Como adestradora Licenciouse en ciencias do deporte e comezou a súa carreira como adestradora no ano 2015 nos equipos femininos do CDE Olímpico e o FF La Solana. Pasou no ano 2017 a adestrar o equipo filial do Rayo Vallecano para coller o ano seguinte o primeiro equipo do Rayo Vallecano da primeira división de fútbol feminino. Continuou a súa carreira na máxima categoría como adestradora no Valencia CF, onde foi destituída antes de rematar a temporada polos malos resultados do equipo. No ano 2019 incorporouse ó corpo técnico do Real Madrid CF como segunda adestradora.
O 1 de xullo de 2022 converteuse en adestradora do Deportivo Abanca da segunda división española de fútbol feminino. En abril de 2024, na súa segunda temporada á fronte do equipo, conseguiu o ascenso á Liga F co Deportivo Abanca a falta dunha xornada para a conclusión do campionato, finalizando a competición como segundo clasificado tralo equipo filial do Fútbol Club Barcelona. Foi destituída do seu cargo en novembro de 2024 polos malos resultados deportivos, deixando o equipo nos postos de descenso da Liga F tras dez xornadas disputadas.
Incorporouse como independente á candidatura de Rafael Louzán á presidencia da Real Federación Española de Fútbol como representante dos adestradores na comisión delegada e tras saír elixido presidente da RFEF en decembro de 2024 formou parte da xunta directiva ata que presentou a dimisión do seu posto por diferenzas coa cúpula directiva da RFEF, cesando en novembro de 2025.
O 15 de maio de 2025 foi confirmada como adestradora do Granada CF para a temporada 2025/26 en substitución de Arturo Díaz. O 24 de xullo de 2026 alcanzou un acordo para desvincularse do Granada CF cando lle restaba unha temporada de contrato, sendo substituída do seu cargo polo segundo adestrador Adrián Martín.
Palmarés Como xogadora Título Club AnoCopa da RaíñaRayo Vallecano2008Superliga2008/20092010/2011
Recoñecemento O concello de Fuenlabrada inaugurou no ano 2020 un campo de fútbol municipal no barrio de Loranca que leva o seu nome.
Notas
Véxase tamén Bibliografía
Ligazóns externas 13x13px
Categoría:Nados en 1989 Categoría:Nados en Fuenlabrada Categoría:Adestradores de fútbol de España Categoría:Gardametas de fútbol Categoría:Futbolistas da Comunidade de Madrid