Ортохантавирус, порано хантавирус (, порано Hantavirus) — род вируси кај луѓето и животните од семејството Hantaviridae (хантавируси) од редот Bunyavirales. Сферичните вириони со големина од 228 до 5051 нм се покриени со липидна обвивка. Типскиот сој за првпат бил опишан во 1978 г. Како членови на редот Bunyavirales, вирусите од родот Orthohantavirus имаат триделен сегментиран геном составен од едноверижна РНК со негативна поларност. Големиот сегмент на геномот кодира РНК-зависна РНК-полимераза (репликаза), средниот — два гликопротеини на надворешната мембрана на вирусот, а малиот — протеин на нуклеокапсидот.
Заразата со хантавируси кај жителите на Европа и Азија се пројавува во лесен облик на хеморагична треска со бубрежен синдром, иако во последните години се пријавени смртни случаи кај болни со вирусот Добрава-Белград (Dobrava-Belgrade orthohantavirus), од кои четири случаи се регистрирани во 2009 г. во Краснодарскиот Крај.
Имињата на вирусите се доделуваат според традицијата на таксономијата за арбовируси и робовируси — во согласност со географската област каде што биле откриени.. Од 2017 г., за да се избегне забуна во имињата на видовите од ист регион, зборот virus во имињата на видовите од родот Orthohantavirus е заменет со orthohantavirus.
Историја на откривањето Првиот голем судир со хантавирусите се смета дека е појавата на болеста позната како „корејска хеморагична треска“. Ова се случило за време на Корејската војна (1950 — 1953), кога повеќе од 3.000 војници на Организацијата на Обединетите нации ги почувствувале ефектите на непознат агенс што предизвикувал внатрешно крвавење и нарушување на функцијата на бубрезите. Нивото на медицината во тоа време не дозволувало да се утврди причината за болеста, па вирусот останал непознат сѐ до 1976 г.
Докторите Ли и Џонсон успеале да го изолираат етиолошкиот агенс од обичен полски глушец. Белодробното ткиво на уловените глодари покажало особена реакција на крвниот серум кај пациенти со корејска хеморагична треска. Подоцна била извршена споредба на соевите на вирусот добиени од глушецот и од заболените луѓе. Во истражувањето истата година била покажана поврзаност помеѓу појавите на слична болест во Советскиот Сојуз. Денес, корејската хеморагична треска е позната како хеморагична треска со бубрежен синдром и докажано е дека ја предизвикува видот Hantaan orthohantavirus.
Појавата на болести и почетокот на истражувањата на хантавирусите на територијата на Соединетите Американски Држави се случиле во 1993 г. во регионот Четири Агли во државата Колорадо. Млад и физички здрав претставник на народот Навахо ненадејно почувствувал слабост, почнал да се гуши и, и покрај сите напори на лекарите, починал. Истрагата покажала дека неколку дена пред случката, свршеницата на младиот човек исто така починала со слични симптоми. За краток период биле забележани вкупно пет аналогни смртни случаи. Истражувачите од Центарот за контрола и превенција на болести на САД (CDC) искористиле нов метод на молекуларна анализа на вируси за да го одредат изворот. Вирусот се покажал како нов, дотогаш непознат вид хантавирус. Подоцна, вирусот го добил името Sin Nombre virus (од шпански: „безимен вирус“).
Наводи
Надворешни врски
CDC's Hantavirus Fact Sheet (PDF) CDC's Hantavirus Technical Information Index page ViralZone: Orthohantavirus
Категорија:Вирусни болести