Empetrum — род од три вида џуџести зимзелени грмушки од семејството вресови, (Ericaceae). Тие се општо познати како бобинки и раѓаат плодови што се јадат. Видовите на Empetrum вклучуваат: Empetrum nigrum и нејзината тетраплоидна форма, која понекогаш се издвојува под сопствено име hermaphroditum, како и Empetrum eamesii и Empetrum rubrum.

Опис Станува збор за ниски, зимзелени грмушки, кои можат да бидат дводомни или еднодомни, со еднополни или хермафродитни цветови. Нивните листови се подредени во спирала, збиени по три до четири во лажни пршлени. Гранките на ова растение се тенки, жилави и разгранети, со кратки, цврсти и тесни листови. За да се спречи прекумерно испарување на водата, рабовите на листовите се свиткани навнатре и формираат цевка која ја крие нивната влакнеста долна површина. Секој цвет е придружен со три брактеи. Цветовите обично имаат по три ливчиња во чашката и исто толку во венчето. Секој цвет содржи по три прашници. Плодникот е сместен над останатите делови на цветот и е поделен на 6 до 9 комори, при што во секоја од нив има по еден зачеток за семе. Плодот потсетува на бобинка и во себе содржи од 2 до 9 коскести семки.

Таксономија Иако во текот на 20 век родот Empetrum и сродните родови (Ceratiola и Corema) се сметале за посебно семејство (Empetraceae), поновите генетички испитувања и лисната градба го потврдиле нивното место во семејството вресови (Ericaceae), каде што формираат посебно племе во потсемејството Ericoideae. Припадниците на ова племе имаат карактеристични физички особини кои се развиле како прилагодување за анемофилија (опрашување со помош на ветар). Распространетост и живеалиште Живеат главно во умерените и ладните региони на Северната Хемисфера, но и на југот од Јужна Америка и на неколку атлантски острови (Фолкландите, Јужна Џорџија и Тристан да Куња). Нивни природни живеалишта се шумите од смрча, тундрите и мочурливите предели, а често можат да се видат и на песочните дини во крајбрежните зони. Во Македонија, на киселите почви во субалпскиот и алпскиот појас на Шар Планина, често се среќава Empetrum nigrum subsp. hermaphroditum. Еволутивните биолози сметаат дека широката и специфична распространетост на овие растенија ширум светот се должи на птиците преселници, кои при нивните далечни миграции ги пренесуваат семките директно од едната до другата полутопка.

Галерија

Наводи

Надворешни врски

Категорија:Бобинки Категорија:Статии со микроформати за вид Категорија:Флора на Македонија Категорија:Флора на Европа