Abel Antón Rodrigo () er ein spansk tidlegare langdistanseløpar frå Ojoel i Soria-provinsen. Han vart europameister på 10 000 meter i 1994 og verdsmeister i maratonløping i både 1997 og 1999.
Aktiv Antón deltok i dei store internasjonale meisterskapane frå 1987. I åra fram til 1993 lukkast han ikkje å blande seg inn i medaljestriden, ein åttandeplass på 5 000 meter under Sommar-OL 1992 var hans fremste prestasjon. Best i denne perioden gjorde han det i innandørs-EM 1990, der han på 3 000 meter vart andremann etter Dieter Baumann frå Tyskland.
I europameisterskapen 1994 deltok Antón fyrst på 10 000 meter, eit løp som gjekk i avventande fart. Åtte løparar var med i sluttspurten om medaljane, ein spurt Antón vann på personleg rekord 28.06,0 framom belgiaren Vincent Rousseau og tyskaren Stéphane Franke. Også 5 000-meteren ei veke seinare enda i ein hæseblæsande spurt, der Antón med 13.38,0 vart nummer tre etter Dieter Baumann (13.36,93) og briten Robert Denmark. Året etter forbetra Antón bestetida si på 10 000 meter til 27.51,3 i kvalfiseringa under Friidretts-VM, men kom likevel ikkje med i finalefeltet.
Frå 1996 satsa Antón på maratonløping, og vann Berlin maraton det året på tida 2.09.15. Året etter sigra han i Seoul maraton. Under verdsmeisterskapen 1997 i Aten vann han gullmedaljen i maraton, etter å ha slite seg laus frå tittelforsvararen Martín Fiz. I mål skilde det fem sekundar mellom dei to spanjolane. Sommaren 1998 sprang Antón inn til triumf i London maraton på personleg bestetid 2.07.57. I 1999 vart han tredjemann i London, før han forsvarte VM-tittelen i maraton på spansk heimegrunn i Sevilla.
Han la opp i 2001.
Medaljar og plasseringar i internasjonale meisterskap VM 1987 i Roma: Nr 14 på 5 000 m – 13.43,5 OL 1988 i Seoul: Utslått i semifinalane på 5 000 m (13.39,1=nr 22) VM 1991 i Tokyo: Nr 11 på 5 000 m – 13.39,0 OL 1992 i Barcelona: Nr 8 på 5 000 m – 13.27,8 VM 1993 i Stuttgart: Nr 11 på 5 000 m – 13.40,2 EM 1994 i Helsinki: Gullmedalje på 10 000 m – 28.06,0 og bronsemedalje på 5 000 m – 13.38,0 VM 1995 i Göteborg: Utslått på 10 000 m (27.51,3=nr 18) OL 1996 i Atlanta: Nr 13 på 10 000 m – 28.29,3 VM 1997 i Aten: Gullmedalje i maraton – 2.13,16, framom Martín Fiz (2.13.21) VM 1999 i Sevilla: Gullmedalje i maraton – 2.13,16, framom Vincenzo Modica (2.14.03) OL 2000 i Sydney: Nr 53 i maraton – 2.24.04
Kjelder Denne artikkelen bygger på «Abel Antón» frå , den 16. juni 2019.
World Athletics
Kategori:Spanske langdistanseløparar Kategori:Spanske maratonløparar Kategori:Verdsmeistrar i friidrett for Spania Kategori:Europameistrar i friidrett for Spania Kategori:Spanske deltakarar under sommar-OL 1988 Kategori:Friidrettsutøvarar under sommar-OL 1988 Kategori:Spanske deltakarar under sommar-OL 1992 Kategori:Friidrettsutøvarar under sommar-OL 1992 Kategori:Spanske deltakarar under sommar-OL 1996 Kategori:Friidrettsutøvarar under sommar-OL 1996 Kategori:Spanske deltakarar under sommar-OL 2000 Kategori:Friidrettsutøvarar under sommar-OL 2000