Jordanka Blagoeva (bulgarsk: Йорданка Благоева; ) er ein bulgarsk tidlegare friidrettsutøvar som i 1972 forbetra verdsrekorden i høgdehopp med to centimeter. Ho vann sølvmedaljen i øvinga ved sommar-OL 1972 og bronsemedaljen i sommar-OL 1976.
Aktiv Blagoeva kom på andreplass i innandørs-EM 1969 i Beograd med 1,82 meter, likt med vinnaren Rita Schmidt frå Aust-Tyskland. I europameisterskapen i Aten hausten 1969 kvalifiserte Blagoeva seg til finalen med eit hopp på 1,74 meter, i finalen stoppa ho på 1,68 m og enda på 13. og siste plass. Ved innandørs-EM 1972 i Grenoble kom Blagoeva på tredjeplass med 1,84 meter, bak to utøvarar frå Aust-Tyskland. Alle tre medaljevinnarane nytta dykk-stilen.
Under dei olympiske leikane i München tok tre deltakarar seg over 1,88 meter. Tyske Ulrike Meyfarth og Blagoeva hadde til dess lukkast i alle sine forsøk, medan verdsrekordhaldaren Ilona Gusenbauer frå Austerrike hadde til saman fem mislukka forsøk på fire høgder. Flophopparen Meyfarth smaug seg over både 1,90 og ho tangerte Gusenbauer sin verdsrekord på 1,92 meter. Dermed vann ho gullmedaljen, Blagoeva fekk sølv med 1,88 m. Den 24. september, tjue dagar etter finalen i München, hoppa Blagoeva over 1,94 meter i Zagreb og sletta verdsrekorden til Gusenbauer og Meyfarth. To år seinare tok Rosemarie Witschas over som verdsrekordhaldar. 11. mars 1973, ved hall-EM i Rotterdam, tok Blagoeva sine einaste internasjonale tiumf. Med 1,92 meter slo ho dei nest beste med heile seks centimeter.
Under sommar-OL 1976 i Montreal var Rosemarie (Witschas) Ackermann klar favoritt, då ho om våren hadde flytta verdsrekorden til 1,96 meter. Etter 1,89 meter stod tre utøvarar utan riv: Sara Simeoni frå Italia, Mária Mračnová frå Tsjekkoslovakia og Jordanka Blagoeva; Ackermann og Joni Huntley frå USA hadde teke høgda i andre forsøk. Tre av utøvarane hoppa 1,91 meter: Simeoni og Ackermann i første forsøk, Blagoeva i andre forsøk. Einast Ackermann hoppa 1,93 m, dermed enda Blagoeva opp med bronsemedaljen.
Medaljar og plasseringar i internasjonale meisterskap OL 1968 i Mexico by: Utslått i kvalifiseringa (1,68=nr 17) EM 1969 i Aten: Nr 13 – 1,68 m OL 1972 i München: Sølvmedalje – 1,88 m, bakom Ulrike Meyfarth (1,92 m) OL 1976 i Montreal: Bronsemedalje – 1,91 m OL 1980 i Moskva: Utslått i kvalifiseringa (1,80 m=nr 16)
Kjelder
World Athletics Denne artikkelen bygger på «Jordanka Blagoewa» frå , den 13. juni 2026.
Kategori:Bulgarske høgdehopparar Kategori:Olympiske sølvmedaljevinnarar for Bulgaria Kategori:Olympiske bronsemedaljevinnarar for Bulgaria Kategori:Friidrettsutøvarar under sommar-OL 1968 Kategori:Bulgarske deltakarar under sommar-OL 1968 Kategori:Medaljevinnarar under sommar-OL 1972 Kategori:Friidrettsutøvarar under sommar-OL 1972 Kategori:Bulgarske deltakarar under sommar-OL 1972 Kategori:Medaljevinnarar under sommar-OL 1976 Kategori:Friidrettsutøvarar under sommar-OL 1976 Kategori:Bulgarske deltakarar under sommar-OL 1976 Kategori:Friidrettsutøvarar under sommar-OL 1980 Kategori:Bulgarske deltakarar under sommar-OL 1980