Зімбабве (анґл. Zimbabwe, /zɪmˈbɑːbweɪ, -wi/), офіціално Република Зімбабве (Republic of Zimbabwe) є держава в южнуй Африці. Лежит межи ріками Замбезі и Лімпопо, граничит из ЮАР, Ботсванов, Замбійов и Мозамбіком. Зімбабве має 16 офіційных языкув, майбулш ся хоснуют анґліцькый, шона и ндебеле.
Теперішньоє Зімбабве было частьов розличных держав и царьств уд XI. сторуча (майвызначні змежи них были Розві и Мтваказі), а кроме того было важным торговым пунктом. Брітанськоє завойованя сьої теріторії ся зачало в році 1890, пак она была орґанізована в колонію Южна Родезія. Обы убминути переданя влады чорнуй булшині, правительство Родезії уголосило независимусть у 1965. році. По 15 роках партізаньскої войны и межинародної ізолації быв пудписаный мирный договор, котрый привюг ид настаню де юре независимої державы Зімбабве. Перші выборы уйграла партізанська орґанізація ЗАНУ-ПФ, што дотеперь держит владу в державі.
Роберт Муґабе быв у функції премєр-міністра и президента Зімбабве уд 1980. до 2017. рока. Його авторітарный режім ся узначив нарушеньом людськых прав, падом економікы и гіперінфлаційов. По довгых протестах против правительства Муґабе в 2017. році настав воєнськый переворот. Днешньым презідентом є Еммерсон Мнанґаґва из партії ЗАНУ-ПФ.
Катеґорія:Країны