Жан-Батист Пон дю Сабл, Jean-Baptiste Pointe du Sable, Jean Baptiste DuSable — быв чорнокожый трапер, котрый первый оселив ся и вецей як 20 рокы жив и газдовав на мѣстѣ, де днесь е Чикаго. Коли ДюСабл пришов на тото мѣсто, была там дика и невлюдна погранична краина, але его подникательскый дух наповѣв му, же тото мѣсто при важных водотоках е обѣцяюче. Днесь е честованый яко закладатель Чикага, а его помник стоить в центрѣ города, обраменый мракодрапами.

Биография Молоды лѣта Отець му быв французскый моряк, мати — чорнокожа Гайтянка, рабыня походжѣньом з Африкы. Жан-Батист родив ся яко слободный, учив ся во Франции, а зачатком 1770-х приплыв до Ню Орлинса и подняв ся горѣ током Миссисипи до Пеории. Сприятелив ся з Индианами племена Потаватоми и женив ся з Индианков на имя Киттигава (Катерина). Мали двое дѣти, сына Жана и дѣвку Сюзан.Meehan, Thomas A., с. 452. Их побраня формално зарегистровав католицкый священник в Кагокии 27. октобра 1778,Chicago's "First" Citizen. //Edwardsville Intelligencer, October 17, 1961 (via Newspapers.com). Одчитане: August 15, 2014. хоть перед тым они побрали ся подля индианского обряда. Жили в обыстю, котре заклав в року 1773 в мѣстѣ, де стоить днешный Чикаго.Keating (2005), pp. 30-31, 221.

Бритске заятя ДюСабл жив и утримовав родину пограничнов торговльов межи Французами, Америчанами и Индианами, достачаючи первым кожушины, а другым стрѣлный порох, пушкы и алкогол. В часѣ Америцкой войны за независимость, в августѣ 1779, Бриты го арештовали, подозрѣваючи яко шпиона, и закрыли в фортѣ Мишилимакинак, Мичиган. Командант форта Арнт Скайлер де Пейстр записав во своих записках: же «Батист Пон де Сейбл» быв «красный негер, добрѣ образованый».Peyster, Arent Schuyler de, с. 10.

В роках 1780-1784 ДюСабл провадив на контролованой Бритами територии торгову штацию Pinery (Сосновый бор) на рѣцѣ Сент Клер в днешном штатѣ Мичиган.

Важна и богата особа По закончѣню войны, в серединѣ року 1784 ДюСабл вернув ся на землѣ племена Потаватоми до своей старой торговой штации в устю рѣкы Чикаго на ей сѣверном березѣ. Найскорша упоминка о той штации походить з 10. мая 1790, коли експедиция Гю ГевардаQuaife, Milo Milton (1933), с. 39. вымѣняла свое каное на пирогу од Пон дю Сабла и докупила собѣ хлѣб, муку и свинске мясо.Heward, Hugh (1928). "Hugh Heward's Journal from Detroit to the Illinois, 1790". In Quaife, Milo M. The John Askin Papers. Volume 1: 1747–1795. Detroit Library Commission. pp. 339–362. ДюСабл быв важнов особов и богатым торговцьом. Его дом мав пышный, просторный салон з великым камяным камином, около него пять комнат, пекарню, удярню, ковалню, хлѣвы, окремы будовы про наятых слуг, обгороженый сад и заградку, понад 800 акры землѣ. В домѣ были образы, зеркала и орѣховый бутор. 17. мая 1800, ДюСабл вшиток маеток продав Жану ЛеЛиму за 6000 ливры и перебрав ся до Сент Чарлзу. Три рокы по тому маеток перекупив Джон Кинзи.Baumann (2005).

Негер-перевозник Сент Чарлз днесь лежить в штатѣ Миссури, але тогды то была Испанска Луизиана. ДюСабл овладав испанскый, як и французскый, английскый языкы и даколькы индианскы диалекты, што му было и потребне в торговли. Испанскый колониалный губернатор звѣрив му обслужованя перевоза через рѣку Миссури.

Што могло быти причинов одхода, неясно. Неодовго перед одходом умерла му жена. Дѣвка оддала ся за Француза и одышла до Луизианы, там робив и сын, што одышов еще скорше. Правдоподобно, же ДюСабл хотѣв быти ближе ку родинѣ и в мѣстѣ переважно французском. В року 1805 ДюСабл купив фундуш на улицях Секонд и Клей в блоку №72 и цѣлый мѣстскый блок №96. В року 1814 умер му сын и быв погребеный на теметовѣ Борромео в Сент Чарлзу.

Нич не знати о его дѣвцѣ Сюзан и внучцѣ, але мав зостати зовсѣм самый, коли в року 1813 переписав свой маеток на сосѣдку, Евлали Барада, котрой отець, Луи Барада, быв мясарь, пекарь и богатый землевластник в Сент Чарлзу, замѣнов за ей обѣцяня, же ся постарать о него в хворотѣ, а тыж обстарать его погреб на католицком теметовѣ в Сент Чарлзу. ДюСабл умер в Сент Чарлзу 28. августа 1818 и быв погребеный в неозначеном гробѣ на теметовѣ Борромео. Парохиална погребна матрика не зазначать ни походжѣня, ни родительох, ни суродникох, ни присутных на погребѣ; опис мать лем едно слово: негер.

Память 12. октобра 1968 быв святочно отвореный гранитный знак на мѣстѣ гаданого гроба Жан-Батиста Пон дю Сабла. 25. октобра 1968 Жан-Батист Пон дю Сабл быв штатом Иллинойс и Чикагом вызнаный за основателя Чикага. Многы инштитуции и мѣста в Чикагу носять имя Жан-Батиста Пон дю Сабла.

Жерела и одказы Baumann, Timothy E. The Du Sable Grave Project in St. Charles, Missouri. //The Missouri Archaeologist, December 2005, vol. 66, pp. 59–76. Одчитане: February 27, 2014. Архивоване: October 21, 2013. Jean-Baptist-Point Du Sable. // Encyclopaedia Britannica. 'Early Chicago: Jean Baptiste DuSable.' // wttw.com Keating, Ann Durkin (2005). Chicagoland: City and Suburbs in the Railroad Age. The University of Chicago Press. . Meehan, Thomas A. Jean Baptiste Point du Sable, the First Chicagoan. // Journal of the Illinois State Historical Society (1908-1984). Vol. 56, No. 3, Emancipation Centennial Issue (Autumn, 1963), pp. 439-453. Peyster, Arent Schuyler de. Miscellanies. Dumfries and Galloway Courier Office, 1813. Одчитане: August 25, 2010 Quaife, Milo Milton (1933). Checagou From Indian Wigwam To Modern City 1673-1835. The University of Chicago Press. Одчитане: August 26, 2010.

Референции

Катеґорія:Особы звязаны з Чикагом