Волт Витман, Walt Whitman, * 31. май 1819, Лонг Айленд, Ню Йорк – † 26. марец 1892, Камден, Ню Джерзи — быв америцкый поет, публициста и новинарь; еден зо закладательох модерной америцкой поезии, пионер вольного верша.
Биография Волт Витман родив ся в 200-рочном родинном фармерском маетку Вест-Гиллс на островѣ Лонг Айленд (днесь подгород Ню Йорка). Школу навщѣвовав в сосѣдном Бруклинѣ (днесь район Ню Йорка), але од 13 рокы пошов ся учити на складача до печатнѣ. По повчетверта роках зачав публиковати ся в новинках, а в роках 1849–1850 сам выдавав новинку. В року 1842 выдав свою перву книжку, повѣданя Franklin Evans, котра нич не вѣщила о его будучой славѣ. Витман одтогды зачав тулацкый живот, працовав лем коли мусѣв, пробывав час в природѣ Лонг Айленда, на бруклинскых улицях, в библиотеках и музеях, а тыж и на политичных сходках, в корчмах и при низкых забавах, набираючи познаня и скушености живота. Але в року 1855 зачудовав свѣт первым выданьом своей поетичной зберкы Листы травы, котра мала тогды лем 12 поезий, в другом выданю (1856) были уже 32, а в року 1860 вышло третье выданя.Ottův slovník naučný, том 27, с. 213.
До того выданя додав еще 122 вершы. В часѣ домовой войны быв санитарьом в шпиталю, а свои рефлексии по войнѣ высловив зберьков поезий Бий, бубне!Герасимчук Л., сс. 5–14.
Ку закончѣню домовой войны (1861–1865) Витман достав пост урядника на державной службѣ, але неодовго быв одты пропущеный за «непристойность» своей поезии.Заблудовский М. З помочов приятельох и чтительох поет достав иншый, омного лѣпшый пост урядника, а его приятель О'Коннор, бойовник против рабства чудесно обгаив его знечещены Листы травы, написавши и выдавши цѣлу брожуру, де называв Витмана «добрым сивовласым поетом», и одтогды тот епитет став ся певнов прозывков поета.Чуковский К., сс. 5–42.
В державной службѣ быв аж до року 1873, коли го поразила мертвиця. Одтогды, хоть ся часточно выздоровѣв, быв одказаный на чужу помочь до конця живота. Одышов до Камдену, де жив у брата, покы не купив собѣ властну хыжу.
Было му нераз пропоновано, жебы зробив даякы поправкы на уступку урядной цензурѣ, але нигда не пристав на то. В року 1882 в Бостону мусѣли знищити майже допечатаный наклад его книжкы, бо прокуратура погрозила выдавательству оскаржѣньом.
Творба
В зборнику Листы травы (1855—92) идеи благодатного приближѣня чоловѣка ку природѣ достають козмичный вымѣр: всякый чоловѣк и хотьякый предмет ся беруть як святы на тлѣ безконечной в часѣ и просторѣ еволуции Вселеной. Чутя суродности зоз всѣма людми и всѣмя явами свѣта выражене через претворѣня лиричного героя на иншых люди и неживы предметы. Витман — пѣсник свѣтовой демокрации, всесвѣтного братства люди праци, позитивных наук, любви и товаришства, не знаючых социалных границ.Прохоров А. М., с. 1380.
Стил поезии Витмана надзвычайно своефайтовый, новаторскый. Он остро протистоить старой «аристократично-панской» литературѣ. Витман створив новый, вольный ритм стиха без римы. Его ритм, еднако одаленый и од обычайного вымѣряного, подѣленого на строфы, римованного стиха и од беспорядочности бесѣдной речи. Тото не камерна лирика, не заглублѣня в дожитя властного «я», а слово ку многым. Витман одшмарив каноны и традиции старой поезии.
В России поезии Витмана товмачив уже его сучасник Иван Тургенев, пак Корней Чуковскый, интересовав ся его творбов Лев Толстой, немалый вплыв мав на Владимира Маяковского и Велимира Хлебникова. В украинской литературѣ вплыв Витмана видко у дакотрых творах Павла Тычины, Михайля Семенка, Богдана Игоря Антонича.
Витман первого вызнаня достав в Англии, але неодовга и в окремых домашных кругах, а нынѣ ся повсемѣстно вызнавать, же его чудны вершы, наперек многым баналностям и смѣлым низкостям, обсягують необычайне богатство своефайтовой захватуючой поезии.
Жерела и одказы
Референции
Катеґорія:Поеты США Катеґорія:Поеты