Євґе́ній Ме́дєші Генц (4. марця 1951 – 28. марця 2025) быв професор фізикы, спортовець тай активный у многых областьох общественого жывота у Руському Керестурі тай паннонсько-русинської общины.
Єден из волонтерув, котрі уд 2022. рока робили над вытворіньом Паннонсько-русинської Вікіпедії, про котру написав коло 80 статий, головно дотычных тематиков ид його фахови.
Жывотопис Євґеній Медєші ся родив 4. марця 1951. рока в Руському Керестурі старшым сыном вызначної учительської пары Йовґена тай Любиці (рожд. Гарді), котрі робили у керестурськуй ошколі. Мав молодшого брата Павла.
У молодшых класах основної ошколы Євґеній указовав любов ид техніці, механіці, радіотехніці тай быв много рокув членом Секції юных технікув, котра робила пуд наставництвом Юліяна Колєсара.
Євґеній кунчив основноє школованя у Руському Керестурі, першу класу ґімназії зачав у Србобрану, а кунчив ґімназію у новосадськуй Ґімназії Йована Йовановича Змая. Штудовав фізику тай дипломовав на Природно-математичному факултетови у Новому Саді.
Робити зачав у Кулі, а за пару рокув перейшов у Керестур у школу Петра Кузмяка, де робив онь до пінзії. Быв єдным из реалізаторув сучасных технолоґій у школі, ініціатором тай довгочасным розробником сайта тай школського часописа „Тайм аут“, вюг секцію астрономії, товмачив учебникы з фізикы тай інформатикы.
Ищи у школські свої рокы Медєші быв у редакції діточого уданя Радіа Нового Сада „Одгуки з ровнїни“, удличив ся як спортовець, бавляч ФК „Русин“ тай водного пола у керестурськум клубі. На 250-роча переселеня руснакув у Паннонію быв ініціатором тай учасником біціґльованя „По драги наших предкох“ из Керестура у Межилабірці.
Быв активным членом керестурського еколоґічного кываня „Желєни персцень“, де за 20 рокув поучаствовав у многых проєктах. Єден из закладателюв туристичного здружіня „Руски Керестур“. Позад проблем из здоровльом пушов на пінзію у марцьови 2016.
Уд самого зачатку, фебруара 2022. рока, робив над проєктом Паннонсько-русинської Вікіпедії пуд хосновацькым имньом Hencrk, написав коло 80 статий, головно за темы из свойої фахової области.
Євґеній Медєші Генц умер 28. марця 2025. року. Похованый на керестурському теметові.
Личный жывут Євґеній Медєші Генц мав за жону Меланію рожд. Тиркайла. Уєдно вни мавут сынув Євґенія тай Ивана.
Ґалерія
Референції