Борис Георгиевич Перчаткин ( Борис Георгиевич Перчаткин; *1. юл 1946) — совѣтскый и америцкый правооборонця, еден из найпознатшых дѣятельох религийного емиграчного руху, што ся зачав концьом 1970-х – зачатком 1980-х рокох у городѣ Находка. Року 1989 быв на чолѣ лобистского дѣятельства у США за приятя «поправкы Лаутенберга» (Lautenberg Amendment), вдякы котрой около 1 милиона представительох религийных меншин из краин бывшого Совѣтского Союза достали право легално емигровати до США.
Биография Ранны рокы и прилученя ку церкви Борис Перчаткин ся родив у фамилии военного пилота незадовго перед тым, як отець му загыб у автокатастрофѣ. По пару роках мати му ся оддала за иншого военного, но року 1983 отчима арештовали за то, же под час бунту одпер выконати розказ, и засудили на 25 рокы каторжных робот у лаграх Воркуты. Яко 16-рочный Борис у Находцѣ прийшов до пятидесятницкой Церкви и став ся ей членом. Надале зачав зберати информации о переслѣдованю вѣрникох у Совѣтском Союзѣ и активно дѣлити ся нев зо заграничныма новинарями.
Емиграчный рух и контакты из дисидентами Року 1976 Перчаткин сполу из соратниками Василийом Патрушевым, В. А. Бурлаченком и Владимиром Степановым навязав контакты из дисидентами у Москвѣ. Дисиденты порадили им дати ростучому емиграчному руху орґанизовану форму. Того ж року Находку навщѣвила представителька Московской Гелсинкской групы Л. В. Воронина. Одтогды Перчаткин активно робив на то, обы организовати масовый выѣзд пятидесятникох из Совѣтского Союза. Послав тыж воззваня до ОЗН, Свѣтовой рады Церков и голов держав, котры подписали Гелсинкскы догоды, информуючи о непрерывных переслѣдованях вѣрникох у СССР.
В року 1977 въедно из Николайом Горети од имени пятидесятникох выступив на защиту арештованых дисидентох Александра Гинзбурга, Юрия Орлова и Анатолия Щаранского. Того ж року сполу из христианами инших конфесий взяв участь у публичной голодовцѣ, вымагаючи дозволу на выѣзд про переслѣдованых христиан.
20. децембра 1978 Перчаткин из пошты у Находцѣ спробовав послати новорочну телеграму президентови США Джимми Картерови, просячи дати увагу на людей, позбавленых религийной слободы.
Од року 1979 быв на чолѣ организачной роботы в створеню центра про вѣрникох, котры хотѣли емигровати. Року 1980 быв выбраный за секретаря новоствореной «Емиграчной рады совѣтскых церков пятидесятникох».
Державны переслѣдованя и арешт Як найактивнѣйшый член комитета вѣрникох, котры подавали жадость на емиграцию, став ся цѣльом репресий од совѣтскых урядох. У мѣстной пресѣ проти ньому и його родинѣ вывинули велику клеветницку кампань.
21. августа 1980 Перчаткина арештовали у Находцѣ. В конци марца 1981,Chronology of Soviet Dissidence: January 1970 through December 1982 за ст. 190.1 Криминалного кодексу РСФСР («шыреня явно ложных вымыслох, котры безчестять совѣтскый державный и общественый устрой») зостав засудженый на 2 рокы лагрох. Подля релаций радиостаницѣ Голос Америкы, под час слѣдства и суда давали му хемичны субстанции (невролептикы), зашто даколько разы страчав тямку.
По выслободженю у августѣ 1982 дале продовжив бой за право на емиграцию. Авшак у фебруарѣ 1983 быв зась арештованый и засудженый на 1,5 рокы лагрох за якобы незаконне ношѣня холодной зброи.
Емиграция до США и поправка Лаутенберга Року 1987 приладив рапорт про Конгрес США «О станѣ религий у СССР». З тым рапортом выступив у Конгресѣ, а пак Перчаткина запросили на стрѣчу из державным секретарьом США Джорджом Шулцом и предсѣдником Высшого суда США Уильямом Ренквистом. У маю 1988, коли президент США Роналд Рейган быв из визитом у Москвѣ, Перчаткин як представитель совѣтскых протестантох в числѣ делегации зоз 40 особ быв запрошеный на стрѣчу из первов дамов Ненси Рейган.
26. юла 1988 Перчаткин зоз цѣлов родинов емигровав до США. 4. августа 1988 выступив у Конгресѣ США из рапортом о геноцидѣ вѣрникох у Совѣтском Союзѣ. Вдякы тым змаганям в року 1989 была прията «поправка Лаутенберга», названа за сенатором Френком Лаутенбером. За першы 10 рокы платности той поправкы около 350 000 религийных утѣкачох оселили ся у США, а до 2010 року тото число досягло около милиона особ.
Обществене дѣятельство у США Жиючи у США, Перчаткин створив персоналный веб-сайт и заклав христианську правооборонну организацию ARRC (American-Russian Relief Committee). Выдав тыж автобиографичну книгу «Огняны ходникы» ( Огненные тропы).
Влѣтѣ 2025 Перчаткин сполу из колегами давав свѣдчѣня у Державном департаментѣ США и Комисии США з межинародной религийной слободы (USCIRF), выказуючи факты переслѣдованя христиан-пацифистох в Украинѣ и Росии. У том контекстѣ тыж лобийовав отворѣня специалной емиграчной квоты про украинскых пацифистох подля програмы U4U.
Упоминкы Познатый совѣтскый дисидент Андрей Сахаров в року 1981 во своей статѣ «Одповѣдалность ученых» прямо споминать имя Бориса Перчаткина межи иншыма политичными арештантами.
Жерела
Референции