Los verbos acabaus en -re en catalán son la continación natural de la tercera conchugacion latina igual como los verbos acabaus en la mesma terminación en aragonés benasqués y en las luengas galorromanicas. En catalán son la part principal adintro de la segunda conchugación.
En catalán y aragonés benasqués la evolución de los verbos de la tercera conchugación latina estió diferent con respecto a l'aragonés cheneral y las luengas iberorromanicas, conservando-se l'accentuación esdrúixola en un primer inte pa dimpués perder-se la vocal post-tónica y formar verbos acabaus en -re. José Antonio Saura Rami: Elementos de fonética y morfosintaxis benasquesas, Zaragoza, Gara d'Edizions-Institución Fernando el Católico (2003). p 214.
EXTENDĔRE > estendre. FUNDĔRE > fondre. APPREHENDĔRE > aprendre. PLOVĔRE > ploure. CREDĔRE > creure. FUTUĔRE > fotre. MOLĔRE > moldre. VENDĔRE > vendre. VIVĔRE > viure. SCRIBĔRE > escriure.
Lo catalán ye la sola luenga romance que conserva en la suya conchugación orichinal a CADĔRE, que cambió de conchugación en romanico común: Heinrich Lausberg: Lingüistica romanica. Tomo II morfología. Editorial Gredos, 1988. pp 258-259. CADĔRE > caure, contrastando con cazer < CADĒRE en occitán y cheoir < CADĒRE en francés.
Han teniu evolucions diferents convertindo-se en grupos verbals especials: PLANGĔRE > planyer.
Han cambiau de conchugación: FUGĔRE > fugir. MULGĔRE > munyir. COLLIGĔRE > collir.
Verbos acabaus en -re derivaus de -ĒRE Son verbos que provienen de la segunda conchugación latina en -ĒRE y que en la suya evolución cambioron de conchugación: CALĒRE > caldre (coexiste con caler). DEBĒRE > deure. DOLĒRE > doldre. MOVĒRE > moure. SEDĒRE > seure TENĒRE > tindre (coexiste con tenir). VALĒRE > valdre (coexiste con valer).
Estos verbos contrastan con la forma que prenen en atras luengas con infitivos en -re como lo francés: chaloir, devoir, mouvoir, seoir, tenir y valoir.
Estas mesmas anomalías en la evolución de las conchugacions verbals s'ha dau en part de l'occitán y en l'aragonés benasqués, y amuestran una tendencia que ya existiba en latín vulgar que ye la responsable de lo cambio de conchugación de los verbos RESPONDĒRE, MISCĒRE, TONDĒRE y TORQUĒRE en amplas zonas de lo dominio lingüistico romanico que no plegoron a incluyir la zona entre l'aragonés y lo galaicoportugués. Esta tendencia tenió lo suyo maximo exponent en sardo, luenga an que se fusionoron las conchugacions latinas en -ĒRE y en -ĔRE con paso de los infinitivos dende la segunda a la tercera.
RESPONDĒRE > RESPONDĔRE > respondre en catalán, répondre en francés, rispóndere en italiano, răspunde en rumano. RIDĒRE > *RIDĔRE > riure en catalán, rire en francés y part de l'occitán, rídere en italiano, râde en rumano. TONDĒRE > TONDĔRE > tondre en catalán y francés, túndere en italiano, tunde en rumano. TORQUĒRE > TORQUĔRE > tòrcer en catalán, tordre en francés, tórcere en italiano, toarce en rumano.
No ye diferent lo comporamiento de RIDĒRE y BIBĒRE entre lo catalán y lo francés. BIBĒRE > *BIBĔRE > beure en catalán, boire en francés.
Referencias
Bibliografía Heinrich Lausberg: Lingüistica romanica. Tomo II morfología. Editorial Gredos, 1988. Carlo Tagliavini: Origenes de las lenguas neolatinas. Fondo de Cultura Economica. 1973. Fernández González, J.R.: Gramática histórica provenzal. Universidat d'Oviedo, 1985. Germán Colón: El español y el catalán, juntos y en contraste Editorial Ariel, 1989. J.A. Saura: Elementos de fonética y morfosintaxis benasquesas, Zaragoza, Gara d'Edizions-Institución Fernando el Católico (2003).
Categoría:Conchugacions verbals en catalán