Borja Iglesias Quintás, nado en Santiago de Compostela o 13 de xaneiro de 1993, é un futbolista galego que xoga na demarcación de dianteiro centro no Celta de Vigo da Primeira División. Formouse nas canteiras do Santiago, do Valencia e do Villarreal e debutou na Primeira División coa camiseta do Celta de Vigo en 2015, despois de militar varios anos no seu filial, do que é o máximo goleador histórico. A continuación conseguiu boas cifras goleadoras no Zaragoza e no Espanyol e en 2019 fichou polo Betis. Co equipo andaluz conquistou a Copa do Rei 2021/22, sendo o máximo goleador do torneo e marcando o único gol do seu equipo na final. Xogou catro tempadas e media no equipo andaluz e a continuación foi cedido primeiro ao Bayer Leverkusen, co que gañou a Bundesliga e a Copa de Alemaña, e logo ao Celta de Vigo.

Internacional coa selección española, gañou o Mundial de Fútbol de 2026.

Traxectoria

Comezos Tras despuntar nas categorías inferiores do Santiago de Compostela CF e da selección de Galicia, fichou en 2007 polo Valencia CF, onde seguiu formándose durante tres anos no fútbol base. No club valenciano adoitaba xogar de extremo, con Paco Alcácer como dianteiro centro. En 2010 incorporouse á canteira do Villareal CF, xogando a súa primeira campaña no CD Roda, equipo vencellado ao Villarreal no que marcou 15 goles, contribuíndo á sexta posición na División de Honra Xuvenil. Na tempada 2011/12 xogou no equipo xuvenil do Villarreal e ao ano seguinte debutou co Villarreal C na Terceira División, anotando 11 goles.

Celta de Vigo B En xullo de 2013 fichou polo Celta de Vigo B, que militaba na Segunda División B. No segundo equipo do club galego foi afianzándose no once inicial ata debutar co primeiro equipo o 3 de xaneiro de 2015, nun partido da Primeira División contra o Sevilla no Sánchez Pizjuán, saltando ao terreo en substitución de Santi Mina.

A súa explosión futbolística definitiva tivo lugar na tempada 2016/17 na Segunda División B, na que pese a ter ficha co primeiro equipo xogou co filial, co obxectivo de ascender á categoría de prata. Ese ano proclamouse o máximo anotador da categoría, con 34 tantos, e converteuse tamén no máximo goleador da historia do filial celeste, con 75 goles, superando a Goran Marić. A pesar destes números non contou con sitio no primeiro equipo por causa da forte competencia, polo que en 2017 saíu cedido ao Real Zaragoza, na Segunda División.

Real Zaragoza Marcou o seu primeiro gol co Zaragoza na segunda xornada, contra o Granada, e no seguinte partido anotou dous goles máis fronte ao Córdoba. No mes de outubro marcou catro goles máis e foi elixido mellor xogador do mes en Segunda. Na penúltima xornada de liga, logrou o seu primeiro triplete como profesional, marcándolle tres goles a Jordi Masip, gardameta do Valladolid, e asegurando a clasificación do equipo aragonés para a promoción de ascenso. Rematou a tempada con 22 goles en liga, só superado polos 33 de Jaime Mata e os 24 de Raúl de Tomás.

RCD Espanyol En xullo de 2018 o Espanyol adestrado por Rubi conseguiu a súa fichaxe, despois de pagar ao Celta de Vigo os 10 millóns de euros da súa cláusula de rescisión. Disputou 37 dos 38 partidos da tempada 2018/19 da Primeira División, marcando o seu primeiro gol na categoría na xornada 2, fronte ao Valencia no RCDE Stadium, e rematando como o sétimo máximo anotador da liga, con 17 goles. Ademais, na xornada 26 contra o Real Valladolid, marcou o gol máis rápido da tempada, batendo ao lucense Diego López cando transcorreran só 18 segundos dende o inicio.

Fixo a pretempada de 2019 co Espanyol, xogando tres partidos da previa da Europa League e marcando tres goles, os tres na primeira eliminatoria contra o Stjarnan islandés.

Real Betis En agosto de 2019 foi traspasado ao Real Betis, despois de que o club andaluz pagase os 28 millóns de euros da cláusula de rescisión. En Sevilla reencontrouse co adestrador Rubi, que o mantivo no equipo titular durante a meirande parte da tempada 2019/20 a pesar dos seus baixos números goleadores (3 tantos en 37 partidos). A situación cambiou a mediados da tempada 2020/21 con Pellegrini no banco. A pesar de ter que esperar ata a xornada 12 para marcar o seu primeiro gol, acabou con 13 tantos e contribuíu de xeito importante á clasificación do equipo para a Europa League. Na tempada 2021/22 aumentou a súa cifra goleadora e foi un dos principais artífices do terceiro título da Copa do Rei na historia do club. Foi, con 5 goles, o máximo goleador do torneo, e foi elixido mellor xogador da final, na que anotou o único gol bético, antes de que o encontro se decidise na quenda de penaltis.

Na tempada 2022/23 marcou 15 goles en liga, conseguindo así o cuarto mellor rexistro da competición, superado só por Lewandowski (23), Benzema (19) e o tamén galego Joselu (16). O seu rendemento baixou na primeira metade da tempada 2023/24, na que non conseguiu ningún gol en liga, sumando só un na Copa do Rei e outro na Europa League. Así, no mercado invernal aceptou ser cedido ao Bayer Leverkusen para tentar recuperar o seu olfacto goleador.

Cesión ao Bayer Leverkusen Debutou na Bundesliga o 3 de febreiro de 2024, xogando como titular no partido da 20ª xornada ante o Darmstadt, que acabou con vitoria do Leverkusen por 0-2. Converteuse así no quinto futbolista galego en xogar na Bundesliga, despois de Rubén González, Joselu, Pablo Insua e Hugo Novoa. Contou con poucos minutos no equipo de Xabi Alonso, co que disputou un total de 10 partidos nunha histórica tempada que culminou co primeiro título de liga da historia do club (rematando con 11 anos de dominio absoluto do Bayern), coa conquista da Copa de Alemaña e co subcampionato da Copa da UEFA.

Cesión ao Celta de Vigo Para a tempada 2024/25, o Betis cedeuno ao Celta de Vigo, regresando así o xogador ao club vigués sete anos despois. En abril de 2025 anotou o primeiro triplete da súa carreira na máxima categoría e fíxoo ante o FC Barcelona, aínda que non serviu para puntuar, porque a vitoria foi para o equipo catalán por 4-3. Pechou a súa primeira campaña no primeiro conxunto céltico como o máximo goleador do equipo con 11 tantos, un máis que Iago Aspas, co que formou parella atacante na maioría de partidos. Cos seus goles contribuíu á clasificación do equipo para a Europa League despois de nove anos de ausencia nas competicións europeas.

Celta de Vigo No verán de 2025 o Celta de Vigo e o Betis acordaron o traspaso do xogador ao club celeste, nunha operación valorada en 1,5 millóns de euros máis variables. Na tempada 2025/26 marcou 14 goles en liga, axudando a unha nova clasificación para a Europa League. Ademais sumou dous goles na Copa do Rei e outros dous na propia Europa League, elevando o total ata 18 goles en 50 partidos.

Selección española O 24 de setembro de 2022 debutou coa selección española, despois de ser convocado polo seleccionador Luis Enrique para a Liga de Nacións da UEFA. A súa estrea produciuse no estadio de La Romareda ante a selección de Suíza, nun partido que acabou en derrota por 1-2. Xogou tamén o seguinte encontro da seleccíón ante Escocia, correspondente á clasificación para a Eurocopa, e a continuación estivo máis de dous anos sen ser convocado. Regresou en 2025 e converteuse nun habitual do seleccionador Luis de la Fuente, que o convocou para o Mundial de 2026. Nesta competición, que venceu a selección española, participou nun partido.

Palmarés Betis Copa do Rei (1): 2021/22.

Bayer Leverkusen Bundesliga (1): 2023/24. Copa de Alemaña (1): 2023/24.

Selección española Copa do Mundo (1): 2026.

Notas

Véxase tamén Ligazóns externas Datos do xogador no sitio web do Betis .

Categoría:Nados en 1993 Categoría:Nados en Santiago de Compostela Categoría:Dianteiros de fútbol Categoría:Futbolistas de Santiago de Compostela Categoría:Xogadores do Villarreal CF C Categoría:Xogadores do Celta de Vigo B Categoría:Xogadores do Celta de Vigo Categoría:Xogadores do Real Zaragoza Categoría:Xogadores do RCD Espanyol Categoría:Xogadores do Real Betis Balompié Categoría:Xogadores do Bayer Leverkusen Categoría:Xogadores da selección de fútbol de España Categoría:Xogadores do Mundial de Fútbol de 2026 Categoría:Futbolistas gañadores do Mundial