Carla Bellato Ortale (Colegn, 12 giugn 1936 – Turin, 11 stèmber 2022) a l’é stàita na poetëssa an lenga piemontèisa, giornalista e condutris radiofònica italian-a.
Biografìa Nàita a Colegn ël 12 giugn 1936, sposà e mama ëd tre fieuj, a l’ha tacà soa atività literaria ant ël 1980, incoragià da col che a l’é stàit un poeta conossù, studios e scritor Camillo Brero, publicand soe prime poesìe an sla arvista Ij Brandè, Armanach-piemontèis, Agenda Piemontèisa e an sël lìber 365 volte Piemonte (Casa Editrice Il Punto).
Ant ël 1985 a l’ha conossù Antonio Bodrero e Gustavo Buratti, mèmber dla Companìa dij Brandé, un grup ëd poeta e scritor an lenga piemontèisa, e a l’ha portà la lenga ant le scòle elementar ëd Grujasch, difondend-ne la cultura e jë strument didàtich giust.
Atività literaria Ant ël 1989 a l’ha ciapà ël second pòst ant ël prestigios Premio Cesare Pavese, organizà da la Fondassion Cesare Pavese për la session literaria an lenga piemontèisa. La giurìa për col ann a comprendìa nòm conossù, com Giorgio Barberi Squarotti, Camillo Brero e àutri espert dël panoram literari italian, a testimoniansa dl'àut livel e dël valor cultural dël premi.Fondazione Cesare Pavese – Archivio premi 1989
Ant ël 1992 a l’ha publicà la racòlta ëd poesìe Ant el biondì dl'amson, presentà ant ël II Rëscontr an sla poesìa piemontèisa a Vila Lascaris ëd Pianëssa (Turin) ël 16 gené 1993. Ant le paròle ëd Brero, cola racòlta a l’é "la documentassion ëd na spiritualità che ant soa përson-a a l’é sfocià ant la poesìa, portand a frut jë 'spì d’òr' che a son ant soa ànima".IBS
La poesìa Ti e mi, dedicà a soa fija pi giovo, a l’ha vagnà ant ël 1992 ël premi Cit Brandè d’òr ant ël Concors Pinin Pacot.Archivio Concorso Pinin Pacot
A l’ha colaborà con ent culturaj com la Ca dë Studi Piemontèis e l’Armanach Piemontèis. Ant ël 1990 soa poesia Mama a l’é stàita musicà da l’artista Carlo Pierangeli e dal pianista Raimondo Barberis.Broadcast Italia – Radio Antenna Ovest
Atività giornalistica e radiofonica A l’é stàita un-a d'le prime poetësse a porté la literatura piemontèisa ant le radio e television locaj dij ani ’80 e ’90. Giornalista publicista, a l’ha conduvù për 19 agn – dal 1980 al 1998 – ël program cultural Aspet ëd vita piemontèisa an sla Radio Antenna Ovest, emitenta turinèisa.
Ël program a l’é stàit segnalà ant ël 1983 dal Bureau International ëd Bruxelles për atività culturaj e recreativ. Cole pontà a son stàite trasmetùe 'dcò a le emitent internassionaj, për esempi Radio Sunchales (Argentin-a), Radio Premià de Mar (Barslon-a) e Italian Alternative Radio (Connecticut).Archivio Bureau International
A l’ha 'dcò conduvù ël program Turin teàter – micròfon an sala e interviste an camerin, ch’a presentava interviste a personalità importante dël teàter torinèis com Ernesto Calindri, Isa Barzizza, Vittorio Gassman, Michele Placido, Giuseppe Erba, Arturo Brachetti, Carla Fracci, Moses Pendleton, Lindsay Kemp, Carol Rama, Gianluigi Marianini.Archivio emittenti locali
Riconossiment Ant ël 2021 a l’ha ciapà ël tìtol ëd sitadin-a onoraria dla sità ëd Grujasch ant ël contest dla manifestassion Gru d’òr. Për motiv ëd salute a l’é stàit ritirà da soa anvoda.Comun ëd Grujasch, comunicà ufissial
Vita privà A l'é sposasse ant ël 1961 con Luigi Ortale e a l'ha avù tre fieuj: Monica, Michele e Caterina, e sinch novod. A l'ha vivù fin-a al 1970 a Colegn, për peui trasloché a Grujasch, andoa a l'é stàita fin-a a soa mòrt, avnùa a Turin për via d’un malor an data 11 ëd stèmber 2022.
Note
Colegament estern Broadcast Italia – Radio Antenna Ovest Colègn IBS – Libr Ant el biondì dl’amson Ortale – Wikisource piemontèisa
Categorìa:Poeta piemontèis Categorìa:Scritor an lenga piemontèisa Categorìa:Giornalista Categorìa:Përsonalità piemontèise