Немато́ды (єдн. немато́да; Nematoda, уд , ) є біолоґічный тип, виды котрого населявут шырокый спектер ушылиякых окружінь. Булшина видув сут непаразитичні и жывлят ся мікроорґанізмами, айбо многі сут паразитами. Паразитичні червакы (гелмінты) причинювут гелмінтозы (червові інфекції).
Нематоды ся класифікувут вєдно з членкарями, помалками и другыми линявучыми звірями у кладі Ecdysozoa. На удлику уд плыскых червакув у нематод трубчаста травна система из отворами на обох кунцях. Як и помалкы, они мавут меншоє число Hox-ґенув.
Виды нематод пораз тяжко удличити єден уд другого, завто тяжко даже приближно вывести їх число. Зглядованя 1993. року припускало, ож годно быти булш як міліон видув нематод. Далші публікації ся в такому числі сомнівали и называли число в маймало 40,000 видув. Подакотрі шацованя досігали чисел до 100 міліонув видув, айбо сучасні зглядованя вдяку баркодованьови ДНК тай из помочов кривых метода розріджіня (rarefaction) указувут на число в дас міліон видув.
Нематоды ся успішно адаптовали д почти кажджуй екосистемі: уд соленої до прісної воды, ґрунту, уд поларных реґіонув до тропікув, уд майнизкых до майвысокых точок. Їх мож найти у кажджуй части земної літосферы, даже на глубині 0.9–3.6 км пуд поверьхностьов Землі у золотых банях Южної Африкы. Они чинят 90% вшыткых звірюв на дні океана. Вцілови 4.4 × 1020 нематод жыют у верьхньых слоях ґрунту вадь дас 60 міліардув на кажджого чоловіка, а майвысока їх густота є в тундрі тай тайзі. Они чинят дас 80% вшыткых звірюв на Земли. Нематоды дуже важні про многі екосистемы, а май — про поларні.
Дас 2,271 родув нематод ся розкладувут по 256 родинах. Межи паразитичными їх формами в т. ч. сут патоґены про многі ростиня тай звірі. Третина родув сут паразитами хребетных; дас 35 видув нематод сут паразитами людий.
Етимолоґія Термін нематода походит уд новолатинського споєня nema- „нитка“ (уд , ґен. nematos „нитка“) + -odes „-подобный“, т. є. буквално значит „ниткоподобный“.
Референції