Томас Майн Рид Thomas Mayne Reid; *4. апрѣля 1818 — †22. октобра 1883 — англицкый писатель, автор авантурных романох и повѣстей, назначеных частьов дѣтям и молодежи, частьов доспѣлым. Гуманистичны социалны тенденции, захватны сюжеты романох зробили Рида едным из найпопуларнѣйшых писательох в розличных сторонах свѣта.Большая Советская энциклопедия.Краткая литературная энциклопедия.
Биография Родив ся в Баллирони, Сѣверна Ирландия, в родинѣ пресвитерианского священика, Томаса Майна Рида ст. и Анны Енн Рид (в дѣвоцтвѣ Резерфорд), дѣвкы пресвитерианского священника. Обое были шкотского походжѣня.Червонный С. М. Школу выходив в родном селѣ и в сосѣдном Кейтсбриджу, по чому учив ся 4 рокы в Кральовском универзитном коледжу в Белфасту на богослова, але наконець не хотѣв прияти священство. Даколько рокы учительовав, але тягло го видѣти свѣта и в року 1840 одышов до США.
Там перепробовав розличны роботы и запознав ся з тамошныма людми и обычаями. Тото вшитко ся му придало в его далшой литературной роботѣ, котру зачав публикациов верши в новинцѣ Питтсбург кроникл под псевдонимом Poor Scholar 'Сегинь штудент' (1842). В року 1843 спознав ся и сприятелив ся з Едгаром Алланом По. В року 1846 зачала ся америцко-мексицка война, де быв спочатку яко корешпондент, а пак воевав яко доброволник. 13. септембра 1847 в бою под Мексико при штурмѣ твердынѣ Чапультепек быв тяжко раненый и зостав лежати на полю боя. Родина в Европѣ была ознамлена, же загынув. Але насправдѣ выжив, быв найденый, вылѣченый, а в маю 1848 демобилизованый яко войновый пензиста и вернув ся до Европы.
Зажиткы з войны описав во своем первом романѣ Стрѣлецка патрола (The Rifle Rangers; or, Adventures in Southern Mexico, 1850), котрый вышов под псевдонимом Капитан Майн Рид. В року 1853, 35-рочный, побрав ся з 15-рочнов Елизабет Гайд, дѣвков свого выдавателя. Тота найвекша пригода его особного живота стала ся предметом романа Жена дѣтвак (The Child Wife: A Tale of Two Worlds, 1868), котрый мав не менше як пять перевыдань, як во Великой Британии так и в США.
Бизнесовы подниканя Рида в Европѣ закончують ся неуспѣшно и в року 1867 еще раз иде до США, зыскуе друге гражданство. В Ню-Йорку выдавать свои 15-томны зобраны писаня и закладать молодежный часопис Вперед (Onward Magazine, 1867). Але в яри 1870 отворили ся стары раны, зачала ся отрава кровли, и быв госпитализованый. В осени 1870 стан его дозвалять му вернути ся з женов до старого краю, але до конця живота зоставать калѣком на манковах. Послѣдны 13 рокы живота пережив в бою з хворотов, великымя болями и психичныма проблемами. Але не переставав писати.
Еще за шѣсть рокы по его смерти выходили му новы книгы, котры не встиг опубликовати за живота.
Творба Томас Майн Рид написав 28 романох, ориентованых на доспѣлого читателя. Найпопуларнѣйшы з них суть Ѣздець без головы (The Headless Horseman, 1865) и Квартеронка (The Quadroon, 1856).Books by Reid, Mayne. //Project Gutenberg.
Роман Ѣздець без головы — авантурный роман вестернового и горорового типа, сюжет котрого розвивать ся в Тексасу, задовго до войны Сѣвера з Югом, а яко другоплановый е в ньом мотив рабовластництва, реалистично описаный каждоденный жывот и справованя в тогочасном Тексасѣ.
Роман Квартеронка — ачей, еден з лѣпшых романох Рида, в ньом поданый широкый и подробный образ живота юга США в добѣ рабства.Томас Майн Рид — Квартеронка. //Сайт Классика книги.
Уже по успѣху первого романа выдаватель Дейвид Боуг просив го написати серию дѣточых повѣстей, и каждый рок перед Роздвом выходила така повѣсть, довъедна были 22. В тых повѣстях героями были дѣти, котры трафили до екстремных ситуаций. Помимо того быв талентованым популаризатором природознаня. Опубликовав етнографичны есеи Необычные народы, выпустив книгу-албум зо зоологии про дѣти — Четвероногы.
Жерела и одказы Большая Советская энциклопедия. Краткая литературная энциклопедия. Гл. ред А.А. Сурков. М.: Сов. Энцикл., 1962—1978. Тт. 1—9. Червонный С.М. По следам капитана Майн Рида.
Книгы Т. М. Рида: Томас Майн Рид — Собрание сочинений в 6 томах. //Сайт Классика книги Твори Майн Ріда на chtyvo.org.ua Books by Reid, Mayne. //Project Gutenberg.
Референции
Катеґорія:Англоязычны писателе